మెగాస్టార్ చిరంజీవి ‘ఆచార్య’గా రూపొందుతోన్న చిత్రం శరవేగంగా షూటింగ్ జరుపుకుంటోంది. మెగా పవర్ స్టార్ రామ్ చరణ్ ఓ కీలకపాత్రలో నటిస్తున్నారు. చిరు సరసన కాజల్, చరణ్ సరసన రష్మిక నటిస్తున్నారు. సక్సెస్‌ఫుల్ చిత్రాల దర్శకుడు కొరటాల శివ కాంబినేషన్‌లో రూపొందుతున్న ఈ చిత్రానికి మెలోడీ బ్రహ్మ మణిశర్మ సంగీతం అందిస్తున్నారు. మొత్తం ఈ చిత్రంలో ఆరు పాటలు ఉంటాయని తెలుస్తుంది. ఆ పాటల వివరాలు ఈ విధంగా ఉన్నాయి.
మెగాస్టార్ చిరంజీవి, కాజల్ అగర్వాల్ మధ్య ఓ రొమాంటిక్ యుగళగీతం ఉంటుందని తెలుస్తుంది. అలాగే రెజీనాతో ఓ ఐటమ్ సాంగ్ ఉంటుందని, ఆ సాంగ్‌ని కూడా ఇప్పటికే చిత్రాకరణ చేసినట్లుగా వార్తలు వచ్చాయి. ఇవి కాకుండా రెండు భక్తి పాటలుంటాయని, వాటిలో ఒకటి శివుడిపై ఉంటే.. రెండోది కాళీకా దేవిపై ఉంటాయని.. ఇవి మాంటేజ్ సాంగ్స్‌గా వస్తాయని తెలుస్తుంది. ఇవి కాకుండా చరణ్, పూజా హెగ్డేలతో ఓ మాస్ బీట్ ప్లాన్ చేశారట. ఇక ఈ 5 పాటలు ఒక ఎత్తు అయితే.. 6వ పాట మరో ఎత్తు. ఎందుకంటే ఈ పాటలో తండ్రీకొడుకులిద్దరూ.. అంటే చిరు, చరణ్‌ల మధ్య ఉద్వేగభరిత సాంగ్ ఉంటుందని అంటున్నారు. ఈ పాట వింటే.. ఒక్కొక్కరికి గూస్ బంప్స్ రావడం ఖాయం అనేలా వార్తలు నడుస్తున్నాయి.
ప్రస్తుతం ఈ చిత్రం మారేడుమిల్లి ఫారెస్ట్‌లో చిత్రీకరణ జరుపుకుంటోంది. చరణ్, రష్మికలపై కొన్ని సన్నివేశాలను చిత్రీకరిస్తున్నారు. కొణిదెల ప్రొడక్షన్ కంపెనీ, మ్యాట్నీ ఎంటర్‌టైన్‌మెంట్స్ బ్యానర్‌పై రూపుదిద్దుకుంటోన్న ఈ చిత్రాన్ని మే 13న ప్రపంచవ్యాప్తంగా గ్రాండ్‌గా విడుదల చేసేందుకు నిర్మాతలు సన్నాహాలు చేస్తున్నారు. త్వరలోనే ఈ చిత్రానికి సంబంధించిన ట్రైలర్‌ను విడుదల చేయనున్నారు.
