జయప్రద, సాయి కుమార్, పూర్ణ వంటి నటీనటులతో తెరకెక్కించిన చిత్రం సువర్ణ సుందరి. టీజర్, ట్రైలర్‌లతో అంచనాలు పెంచిన సువర్ణ సుందరి సినిమా శుక్రవారం ప్రేక్షకుల ముందుకు వచ్చింది. ఈ చిత్రం ఆడియెన్స్‌ను ఏ మేరకు మెప్పించిందో ఓ సారి చూద్దాం.
కథ
సువర్ణ సుందరి కథ అంతా కూడా త్రినేత్రి అమ్మవారి విగ్రహం చుట్టూ తిరుగుతుంది. కాకపోతే ఆ విగ్రహం వల్ల అంతా వినాశనమే జరుగుతుంది. సువర్ణ సుందరిగా పిలిచే ఆ విగ్రహంలో దుష్టశక్తి ఎలా ప్రవేశించింది? అది అసలు ఎందుకు అలా మారింది? దానికి అంజలి (పూర్ణ) ఎలా బలైంది. సాక్షి (సాక్షి చౌదరి)కి ఆ విగ్రహంతో ఉన్న సంబంధం ఏంటి? విశాలాక్షి (జయ ప్రద) ఆ సువర్ణ సుందరిని అడ్డుకునేందుకు ఏం చేసింది? ఈ కథలో పోలీస్ ఆఫీసర్ గుణ (సాయి కుమార్) పాత్ర ఏంటి? అన్నది తెలియాలంటే థియేటర్‌కు వెళ్లాల్సిందే.
నటీనటులు
అంజలి పాత్రలో పూర్ణ ఫ్లాష్ బ్యాక్ ఎపిసోడ్‌లో ఎంతో నిండుగా కనిపిస్తుంది. ప్రజెంట్‌ సీన్లు వచ్చినప్పుడు ఎంతో మోడ్రన్‌గా కనిపిస్తుంటారు. ఇక సాక్షి సైతం ఫ్లాష్ బ్యాక్ ఎపిసోడ్‌లో అదరగొట్టేస్తుంది. జయ ప్రద తన అనుభవాన్ని చూపించారు. సాయి కుమార్ పాత్ర కూడా ఉన్నంత సేపు ఆకట్టుకుంటుంది. కోట శ్రీనివాసరావు, నాగినీడు, అవినాష్‌ వంటి వారు తమ తమ పాత్రలను అద్భుతంగా పోషించారు. మిగిలిన పాత్రలన్నీ కూడా తమ పరిధి మేరకు నటించారు.
విశ్లేషణ
సువర్ణ సుందరి కథ ఎంతో అద్భుతంగా అనిపిస్తుంది. ఓ విగ్రహం.. చూడటానికి దేవతలా ఉంటుంది.. కానీ అందులో అనంతమైన దుష్ట శక్తి ఉంటుంది. దాని రక్త దాహం తీర్చుకోవడానికి రాజ్యాలను సైతం మట్టు బెట్టేస్తుంది. అది ఎవరి చేతిలో ఉంటే.. వారు రాక్షసుల్లా మారిపోతారు. చుట్టు పక్కల ఉన్న వారిని చంపేసి రక్తం దాహం తీర్చుకుంటారు. వినడానికి ఈ పాయింట్ బాగుంటుంది. అంత శక్తి వంతమైన విగ్రహాన్ని ఎవరు మట్టు బెడతారు.. ఎలా ఆట కట్టిస్తారు.. వంటి పాయింట్లు ప్రేక్షకుడిని తొలిచేస్తుంటాయి.
అలా ప్రేక్షకుడిని ఎంగేజ్ చేయడంలో దర్శకుడు సక్సెస్ అయ్యాడు. సువర్ణ సుందరి చేసే విధ్వంసం గురించి మొదటి సీన్లోనే చూపించి అందరినీ భయపెట్టేశాడు. భయపెట్టడంలో మాత్రం సువర్ణ సుందరి సక్సెస్ అయింది. ప్రథమార్థంలో సువర్ణ సుందరి ఎంట్రీ ఇచ్చే సీన్లు బాగానే ఉంటాయి. ప్రస్తుతం అంటూ మోడ్రన్ ప్రపంచంలో చూపించే సీన్లు కాస్త స్లోగా అనిపించినా.. సువర్ణ సుందరి ఎంట్రీ ఇచ్చాక జరిగే పరిణామాలు అందరినీ ఆకట్టుకుంటాయి.
ద్వితీయార్థంలోనే అసలు కథ రివీల్ అవుతుంది. సువర్ణ సుందరిని ఎలా అడ్డుకుంటారు.. అసలు సువర్ణ సుందరి నేపథ్యం ఏంటి? అనేది తెలిశాక ప్రేక్షకుడు ఆశ్చర్యపోతారు. అయితే ఈ సినిమా పాయింట్ గొప్పగా అనిపిస్తుంది. కానీ మేకింగ్‌లో మాత్రం అంత శ్రద్ద కనిపించదేమో అని ప్రేక్షకుడు ఫీల్ అయ్యే అవకాశం ఉంది. ఈ సినిమాను ఇంకాస్త బాగా తీయోచ్చు కదా? అనే అనుమానం ఆడియెన్స్‌కు కలుగుతుంది.
ఈ సినిమాకు విజువల్స్, ఆర్ఆర్ మాత్రం ప్రాణంగా నిలిచాయి. నిడివి తక్కువే కావడం ప్లస్ పాయింట్. పాటలు అంతగా గుర్తుండకపోయినా మాటలు మెప్పిస్తాయి. నిర్మాణ విలువలు సినిమా స్థాయికి తగ్గట్టుగా ఉన్నాయి.
ఫైనల్‌గా.. భయపెట్టే సువర్ణ సుందరి
రేటింగ్: 3.5
