కుర్రాళ్ల టోర్నీలకు ఏ మాత్రం తీసిపోకుండా సాగిన లెజెండ్స్ సిరీస్ ఆద్యంతం అద్భుతంగా సాగింది. తమ ఫేవరెట్ సీనియర్ ప్లేయర్లను తిరిగి చూడలేమనుకున్న క్రికెట్ అభిమానులంతా ఈ టోర్నీతో ఎంతో మజానిచ్చింది. సెహ్వాగ్ అప్పర్ కట్, సచిన్ స్ట్రెయిట్ డ్రైవ్, దిల్షన్ దిల్ స్కూప్, పీటర్సన్ స్విచ్ హిట్.. వీటన్నింటినీ మిస్ అయిన ప్రేక్షకులను రోడ్ సేఫ్టీ టోర్నమెంట్ మధుర జ్ఞాపకాలను మిగిల్చింది. కాగా ఈ టోర్నీలో ఇండియా లెజెండ్స్ మొదటి నుంచి టాప్ ప్లేస్‌లో కొనసాగుతోంది.
సెహ్వాగ్, సచిన్, యువీ, యూసుఫ్ వంటి ఆటగాళ్లంగా బ్యాటింగ్‌లో అదరగొడుతుంటే.. ఇర్ఫాన్, మునాఫ్, గోనీ, వినయ్ వంటి బౌలర్లు అద్భుతమైన బౌలింగ్‌తో ఆకట్టుకున్నారు. అయితే వీరందరిలోనూ యువరాజ్ సింగ్ టోర్నీకే హైలెట్‌గా నిలిచాడు. ప్రతి మ్యాచ్‌లోనూ సిక్సర్లతో ప్రత్యర్థులపై విరుచుకుపడ్డాడు. టోర్నీలోనే అత్యధికంగా 17 సిక్సులతో విజృంభించాడు. ఇక శ్రీలంకతో జరిగిన ఫైనల్లో కూడా యువీ ఆకాశమే హద్దుగా చెలరేగాడు. సిక్సర్ల వర్షం కురిపించాడు. దీంతో ఇండియా లెజెండ్స్ 181 పరుగుల భారీ స్కోరు చేసింది. ఛేదనలో శ్రీలంక 166 పరుగులు మాత్రమే చేసి 15 పరుగుల తేడాతో ఓడిపోయింది.
View this post on Instagram
అద్భుతమైన విజయంతో తిరిగొచ్చిన ఇండియా లెజెండ్స్‌కు భారీ హోటల్ యాజమాన్యం ఘన స్వాగతం పలికింది. ముఖ్యంగా యువీకి ప్రత్యేకంగా గాడ్ ఆఫ్ హానర్ స్టైల్లో వెల్‌కమ్ చెప్పింది. లెజెండ్స్ విజయంలో కీలక పాత్ర పోషించినందుకు గానూ యువీని బాహుబలి పాటతో స్వాగతించారు. బ్యాక్‌గ్రౌండ్‌లో బాహుబలి సాంగ్ ప్లే అవుతుండగా.. హోటల్ సిబ్బంది అంతా అటూ.. ఇటూ నిలబడి పొడవాడి గరిటెలను పైకెత్తి స్వాగతం పలికారు. వారి మధ్యలో నుంచి వచ్చిన యూవీ.. బాహుబలి సాంగ్‌కు లయబద్ధంగా డాన్స్ చేస్తూ ముందుకెళ్లాడు. ఈ వీడియోను యువీ స్వయంగా తన సోషల్ మీడియా ఖాతాలో పోస్ట్ చేశాడు. దీంతో ప్రస్తుతం ఇది సోషల్ మీడియాలో విపరీతంగా వైరల్ అవుతోంది.
