నాయకుడంటే అందరినీ నడిపించే వాడే కాదు. అద్భుతంగా రాణించినప్పుడు భుజం తట్టి ప్రోత్సహించేవాడు. అందరిపై అజమాయిషీ చెలాయించేవాడు కాదు.. అందరితో కలిసి ముందుకు నడిచేవాడు. ఈ లక్షణాలన్నీ ప్రస్తుత టీమిండియా కెప్టెన్ విరాట్ కోహ్లీలో స్పష్టంగా ఉంటాయి. అందుకే అతడు టీమిండియాను మునుపటి కెప్టెన్ల కంటే గొప్పగా జట్టును ముందుండి నడిపించగలుగుతున్నాడు. తాజాగా ఐపీఎల్‌లో అది మరోసారి రుజువైంది. కెప్టెన్ అంటే ఎలా ఉండాలో, క్రీడా స్ఫూర్తి అంటే ఏంటో కోహ్లీ మరోసారి నిరూపించుకున్నాడు. దీనికి సంబంధించిన వీడియో ప్రస్తుతం సోషల్ మీడియాలో తెగ చక్కర్లు కొడుతోంది. ఈ వీడియో చూసిన క్రికెట్ అభిమానులంతా కోహ్లీని ఆకాశానికెత్తేస్తున్నారు. ‘అది కోహ్లీ అంటే.. అసలైన కెప్టెన్ అనిపించుకున్నాడు’ అంటూ ప్రశంసలతో ముంచెత్తుతున్నారు.
శుక్రవారం రాయల్‌ చాలెంజర్స్‌ బెంగళూరుతో జరిగిన మ్యాచ్‌లో హర్ప్రీత్ బ్రర్ అద్భుత బౌలింగ్‌తో క్రికెట్ అభిమానులను మంత్ర ముగ్ధుల్ని చేశాడు. విరాట్ కోహ్లీ, గ్లెన్ మ్యాక్స్‌వెల్, ఏబీడివిలియర్స్ వంటి ప్రపంచ మేటి ఆటగాళ్లను వరుస ఓవర్లలో బోల్తా కొట్టించి ఆర్సీబీ వెన్ను విరిచాడు. కీలక వికెట్లు తీసి ప్రత్యర్థి జట్టు పతనాన్ని శాసించాడు. ప్లేయర్‌ ఆఫ్‌ ది మ్యాచ్‌గా నిలిచాడు. ఇక ఐపీఎల్‌లో అతడికిదే తొలి మ్యాచ్ కాగా.. మొదటి వికెట్‌గా ఆర్సీబీ కెప్టెన్ విరాట్ కోహ్లీని అవుట్‌ చేసి కెరీర్లోనే ఓ స్వీట్ మెమరీని సంపాదించుకున్నాడు.
హర్ప్రీత్ స్పిన్ మాయాజాలంతో పంజాబ్ ఏకంగా 34 పరుగుల తేడాతో ఆర్సీబీని మట్టి కరిపించింది. మ్యాచ్ పూర్తయిన తర్వాత హర్ప్రీత్ బ్రర్ తన సహచర ఆటగాడితో ఏదో మాట్లాడుతున్నాడు. ఇంతలో అక్కడకు విరాట్ కోహ్లీ వచ్చాడు. హర్ప్రీత్‌ను కలిసి అతడికి షేక్ హ్యాండ్ ఇచ్చి.. భుజం తట్టి అభినందించాడు. దీనికి సంబంధించిన వీడియోను ఐపీఎల్‌ తన ట్విటర్‌లో షేర్‌ చేసింది. ‘మొదట కోహ్లీ వికెట్.. ఇప్పుడు అతడి నుంచే ప్రశంసలు.. కోహ్లీతో గుర్తుండిపోయే మధుర జ్ఞాపకంగా బ్రర్‌కు ఇది మిగిలిపోతుంది’ అంటూ ఆ వీడియోకు ఓ కామెంట్ జతచేసింది.
First, the wicket & then, the appreciation from the man himself! 🤝@thisisbrar will surely cherish this moment with @imVkohli! 😊#VIVOIPL #PBKSvRCB pic.twitter.com/ovXmadbyKN
— IndianPremierLeague (@IPL) April 30, 2021
ఈ వీడియో ప్రస్తుతం సోషల్ మీడియాలో వైరల్‌ అవుతోంది. కోహ్లీ ఫ్యాన్స్‌ అతడిని అభినందనలతో ముంచెత్తుతుండగా.. పంజాబ్ అభిమానులు కూడా రన్‌మెషీన్‌పై ప్రశంసలు కురిపిస్తున్నారు. ‘లెజెండ్స్‌ ఇలాగే యువ ఆటగాళ్లను ప్రోత్సహిస్తారు. క్రీడాస్ఫూర్తి అంటే ఇదే. అద్భుతమైన బౌలింగ్‌తో తనను అవుట్‌ చేసిన యువ బౌలర్‌ను అభినందించి కోహ్లీ మరోసారి అందరి మనసులు గెల్చుకున్నాడు. కోహ్లీ.. నిజంగా బెస్ట్‌ కెప్టెన్ నీవు’ అని అనేకమంది నెటిజన్లు కామెంట్లు చేస్తున్నారు.
