కరోనా వ్యాక్సిన్ తీసుకుంటే గుండెమంట వస్తుందా..? అంటే అవుననే సమాధానం చెబుతోంది ఇజ్రాయెల్ ఆరోగ్య శాఖ. కోవిడ్-19 కోసం ఫైజర్ వ్యాక్సిన్ తీసుకున్న కొందరిలో గుండె మండుతున్న సైడ్ ఎఫెక్ట్ గుర్తించినట్లు ప్రకటించింది. ముఖ్యంగా ఈ వ్యాక్సిన్ తీసుకున్న యువతలోనే ఈ లక్షణాలు ఎక్కువగా కనిపించినట్లు వెల్లడించింది. దీనికి సంబంధించి నిర్వహించిన అధ్యయనంలోనే ఈ విషయాలు వెల్లడైనట్లు తెలిపింది. వ్యాక్సిన్‌కు, ఈ సైడ్ ఎఫెక్ట్‌లకు సంబంధం ఉండవచ్చునని పేర్కొంది. ఈ అంశంపై నిర్వహించిన అధ్యయనంలో ఈ వివరాలు వెల్లడైనట్లు తెలిపింది.
ఇజ్రాయెల్ ఆరోగ్య మంత్రిత్వ శాఖ తెలిపిన విషయాల ప్రకారం.. గతేడాది డిసెంబరు నుంచి దేశ వ్యాప్తంగా ఇప్పటివరకు సుమారు 5 మిలియన్ల మంది వ్యాక్సిన్ తీసుకున్నారు. వీరిలో 275 మందికి మయొకార్డిటిస్(గుండె మంట) వచ్చినట్లు వెల్లడైంది. ఈ లక్షణాలు గుర్తించిన వారిలో ఎక్కువ మంది దాదాపు 4 రోజులపాటు ఆసుపత్రులలో చికిత్స పొందారు. ఇటువంటి కేసుల్లో 95 శాతం స్వల్ప స్థాయికి చెందినవే. దీంతో దీనిపై నిపుణులతో కూడిన 3 బృందాలు అధ్యయనం చేశాయి. ఈ అధ్యయనంలో ఫైజర్ వ్యాక్సిన్ రెండో డోసు తీసుకున్నవారిలోనే మయొకార్డిటిస్ రావడం గుర్తించినట్లు తేలింది. అది కూడా 16 నుంచి 30 సంవత్సరాల మధ్య వయసున్నవారిలో కనిపించాయి. మరీ ముఖ్యంగా 16 నుంచి 19 ఏళ్ల మధ్య వయసువారిలో ఎక్కువగా కనిపించింది.
కాగా.. ఫైజర్, మోడెర్నా అభివృద్ధిపరచిన వ్యాక్సిన్లతో సహా ఎంఆర్‌ఎన్‌ఏ వ్యాక్సిన్లకు, మయోకార్డిటిస్‌కు మధ్య సంబంధంపై అధ్యయనం చేయాలని అమెరికా సెంటర్స్ ఫర్ డిసీజ్ కంట్రోల్ అండ్ ప్రివెన్షన్ గత నెలలోనే ఆదేశించాయి. ఈ క్రమంలోనే ఇజ్రాయెల్ ఆరోగ్య మంత్రిత్వ శాఖ ప్రకటనపై ఫైజర్ సంస్థ కూడా స్పందించింది. ఫైజర్ వ్యాక్సిన్ తీసుకున్న కొందరిలో మయోకార్డిటిస్ కనిపించినట్లు తెలిసిందని, అయితే వ్యాక్సిన్‌కు, దీనికి మధ్య సంబంధం ఉన్నట్లు స్పష్టంగా తెలియడం లేదని తెలిపింది. ఇటువంటి ప్రతికూల అంశాలపై క్షుణ్ణంగా సమీక్ష జరుపుతామని, ఇజ్రాయెల్ ఆరోగ్య మంత్రిత్వ శాఖలోని వ్యాక్సిన్ సేఫ్టీ డిపార్ట్‌మెంట్‌తో నిరంతరం సమావేశమవుతున్నామని వెల్లడించింది.
